庸材自擾：要女人遷就嘅男人，註定一世孤獨終老
我成日覺得一個人嘅成長，必定需要一啲歷練，事情發展好與壞都唔緊要，因為總會響事情裡面攞到啟發同得著，一個人太過受保護，沒經歷過挫折，人生閱歷反而變得唔完整。
年青嘅時候，父母會擔心子女拍拖，一來怕影響學業，二來怕做錯事唔小心就搞大咗個肚，對身體或者將來都有深遠影響；出來社會工作，父母又會擔心子女喺公司裡面唔知識啲咩壞人，唔想子女俾人呃，就設下好多唔同嘅規條去監管仔女，唔俾佢地出夜街。
管下管下，開始發現自己嘅子女已經去到中年，又開始擔心佢地將來會結唔成婚，怕佢哋下半世冇人會陪伴佢哋，諗諗下，真係搞到人都癲。
娟姐正正就係呢類型嘅父母，佢有一個女，細個嘅時候怕佢學壞俾人呃，就唔俾個女出街，就算出都會偷偷咁跟響個女後面，睇下佢識咩人。到個女大個出黎做嘢，就誤���報紙講話聖誕節好多人發生性行為而搞大個肚，大時大節都唔會俾個女同朋友出街，點知，個女而家已經三十歲，就開始擔心冇人要。
於是佢又做埋啲雞仔媒人，四圍走去問下有冇朋友幫個女介紹相睇，好不容易咁搵到一個三十幾歲嘅單身男人，娟姐二話不說就要求佢朋友介紹個男仔俾個女識，希望撮合到所謂既姻緣。
介紹人係個男仔嘅親戚，佢講過男人嘅背景，娟姐聽到都覺得相當唔錯，男人任職大公司嘅經理，有車有樓，只係冇乜頭髮，可能係咁，介紹人就覺得自己攞咗個主導權，響安排約會嘅時候，完全冇理會過娟姐嘅意見。
首先，男人住屯門，而娟姐住香港仔，本來一開始大家話叫多啲人出來燒嘢食認識下先，娟姐係舉腳贊成，點知個男人話燒烤嘅地方係屯門蝴蝶灣公眾燒烤場，仲叫娟姐佢地買炭同汽水入去。
娟姐其實聽完都覺得有問題，但係又唔好意思拒絕，因為佢覺得男仔嘅條件好好，怕個女冇咗個機會，但係由香港仔入屯門再加買炭同汽水，佢又覺得有啲辛苦，所以問我意見應該點做。
我聽完成個故事之後，第一句就話佢做乜攪到個女咁Cheap，將自己嘅身段擺到咁低。
我同娟姐講，香港有咁多燒烤場，點解男方要女方入屯門而唔選擇一個中間位。第二點解咁蠢唔選擇自助燒烤場，有人起爐同預備食物，點解要搞到自己咁辛苦。最後，就係男女雙方未成為情侶，男方就已經咁自私唔考慮女方感受，將來真係一齊，仲會覺得男方會錫住娟姐個女？
愛情，要行得遠和幸福，最重要就係互相尊重，雖然話廿二世紀講男女平等，但我總認為響相睇或者初次約會嘅時候，男方應該花多啲心思去討好異性，而唔係覺得自己條件較好就唔尊重人。
幸福，要靠自己爭取，不過首先關係要對等。
要女人遷就嘅男人，註定一世孤獨終老。
