庸材自擾：每個朋友圈入面，總有一個任笑唔嬲嘅傻仔

人到中年，朋友隨住歲月嘅增長而逐年遞減，可以話係貴精不貴多。

以前讀書，要約一班朋友出嚟唔難，一班男仔冇嘢做，一個電話就成班衝晒落去球場吹水飲酒，去波樓篤波食煙，又或者係全男班走去唱卡拉ＯＫ，唔好問日日咁樣出街悶唔悶，當時嘅角度反而係唔出街留響屋企對住阿爸阿媽仲悶。

出來社會工作，你忙我忙，有啲朋友日日朝7晚9唔能夠出席聚會，有啲朋友慢慢又識到其他朋友而漸漸疏遠，就係咁去到某個年紀先會發現現來所謂嘅朋友真係冇乜幾個。

曾經有人話過，做活動搞手仲慘過擔泥，呢個說法我非常同意，有時候工作家庭，朋友之間已經唔可以話見就見，有時候要1個星期或者要1個月提前預約，有時候即使真係約到但都未必嚟到。

悲劇。

好多人會話由細識到大嘅朋友就算好耐唔見面，見返面都會雞啄唔斷，我同意，我哋會分享下自己嘅近況，講下女人，吐下工作嘅苦水，但係咩話題都好，聚會話題最尾都會圍住某個朋友細個時候嘅瘀事無限輪迴。

呢種成日被朋友攞黎開玩笑既人，好多人話佢地係下靶或者係傻仔，但其實呢類人先至係朋友圈裡面最重要嘅人，上帝話我知，呢種人叫聖人。

冇咗佢哋，成個聚會好似冇乜生氣；

冇咗佢哋，成班朋友好似好多話題，但係又好似唔太投入；

冇咗佢哋，想搵其他人笑下，但係又怕對方嬲而唔敢開玩笑。

係，所謂嘅下靶亦即聖人，一直都係朋友圈裡面最抵得諗嘅人，佢哋一旱已經知道自己嘅位置，任其他人點嘲笑佢點玩佢都好，佢都唔會嬲，仲會攞自己嘅瘀事出來笑埋一份。

人到中年，各有各忙，有幸搞得成一個聚會，就因為佢哋想個聚會氣氛好，想大家有個難忘嘅聚會而將自己擺到一個下靶位置，任憑大家去愚弄羞辱。

好多人會話「佢真係傻仔，所以我先笑佢」，但換個角度諗，一個正常人明知道每次聚會俾你笑都仲肯出嚟，佢唔係因為珍惜呢段友誼又點會咁做。

我係咪應該唔再笑佢，唔再玩佢？

錯！

唔笑佢，個聚會仲點會好玩，仲點會有咁多話題？

友情不用堆砌，就係因為大家係朋友，所以先要笑佢哋，明未？

Tag你朋友，多謝佢呢一個喺朋友圈入面嘅傻仔。