庸材自擾：創業唔難，只需要勇氣

人生，充滿無數困惑。

響香港呢個拜金主義社會，在傳統思想薰陶底下，彷彿人生目標離唔開錢同樓。細細個家人向你洗腦，同你講俾心機讀書，將來大學畢業就可以位高要職，坐冷氣房舒服工作，唔駛日曬雨淋咁辛苦。

你信，點知大學畢業出嚟嘅第一份工，薪金只係僅僅高過最低工資，計埋Grant Loan、家用、生活費、拍拖等種種開支，剩低嘅錢少到都唔知儲好定用黎進修好。

思前想後，我哋信香港政府既宣傳話持續進修，以為學歷改變命運，誰知升職後嘅人工都追唔上樓市升幅，買樓結婚彷彿係痴人說夢。

有時會諗，自己嘅人生係咪就咁完結？

收入，是否以悲微嘅通脹升幅去計算？

好多人唔甘心人生就咁碌碌無為虛度過去，所以好多人選擇追夢或者係創業。

「攪咁多野做乜，腳踏實地仲好啦！」

「你嘅生意好多人都做緊，你憑咩覺得自己會成功？」

「成份積蓄攞去攪生意，失敗咗點算？」

勸退嘅說話我哋聽得好多，問家人問朋友，個個都對創業抱有懷疑，認為風險太大，失敗嘅話，雖未必家破人亡，卻一定前途歸零，要響職場上面從頭來過。糾結，在於朋友同家人嘅說話不無道理，腳踏實地雖未必能夠致富，但做打工仔穩打紮至少可以豐衣足食。

夢想呢回事，就係因為社會嘅現實而慢慢淡忘。

最近有朋友諗住開餐廳，問我有冇興趣夾份一齊做，埋於心底嘅創業夢再一次被激發出嚟，但情況唔同，今時今日嘅我，要顧及既係太太、女兒，仲有供車供樓等龐大開支。

其實我都諗住太太唔會支持，不過我都問下佢意見。

「老婆，我想同朋友夾錢開間餐廳，好唔好呀？」

「好呀！聯名戶口啲錢你攞去用。」

「吓？你唔問我攞幾多錢既？你唔怕冇錢供車供樓咩？」

「諗過度過之後，計好數你咪做囉，總之我一定支持你。」

我淺笑了一下。

冇人可以預見到將來係點，但人生遇到困惑或者糾結嘅時候，男人需要嘅其實係太太或者家人嘅支持。冇人夠膽講創業一定會發達，但同樣地亦冇人夠膽講創業嘅結局一定係失敗收場。每個人背負既事情唔同，承擔既壓力同後果亦都唔同，可以做既就只有周詳考慮，再加上親人支持同勇氣去完成自己嘅創業夢。

周星馳話：「做人冇夢想，同咸魚有咩分別？」

我會話：「如果有一日我要死，我希望係死喺自己手上」。

做人做事，要交待嘅一直只有自己。