天花板垂下 仙氣鳥籠下午茶
下午茶每星期都有新花樣！呢個叫「鳥。語」嘅下午茶，雖然無可愛雀仔唱歌，但有一個一個花花鳥籠從天花板垂下來，仙氣十足！仲載住好多款下午茶鹹甜點，氣質女生們，仲等？
呢個咁仙氣嘅下午茶套餐，係尖東的九龍香格里拉大酒店最近推出，叫「鳥。語」，個名充滿詩意。以酒店級數和 gimmick 睇，以為會好貴，但消費卻合理，下午茶每位 $288，兩位只係 $488（設加一），計起來兩個 frd 子齊齊吃抵啲喎！
下午茶氣氛好有鋪排，走到酒店大堂，已見到色彩繽紛嘅鳥籠擺設，再走入酒廊窗邊位置，就有一排由天花板垂吊下來、布滿花花裝飾的鳥籠，垂到餐枱旁，鳥籠以繩子連結住枱邊固定好，唔會左搖右擺。望一望，原來唔止係裝飾，上面放滿下午茶美點！Suprised！
鳥籠以魚絲從天花板垂下到餐枱旁，好特別呀！有 4 層高，鹹甜點分門別類；客人可預早選擇中式或歐陸式下午茶，無論中、西款式都分成「序幕」、「招牌美點」、「時尚經典」及「甜蜜最終章」，令食物味度及層次發揮得最好。無論揀中式定歐陸式，每位客人甫坐下都可享一杯 welcome drink，特飲款式每星期轉換一次，圖中是香梨蓉及桃茶凍飲，以及紫蘿蘭花茶；同時送上鮮果拼盤、自家製鬆餅及果醬。
歐陸式 choice
歐陸式 tea set 的煙牛肉雜菜凍伴松子仁醬及鄉村芝士，牛肉煙燻味濃，伴松子仁醬及芝士，鹹鹹香香味道濃惹。
外型似甜點，實質係鴨肝醬伴奶油包，面層棗紅色是梅味醬，底層係香濃 creamy 鴨肝醬及酥餅，酸咪梅味中和鴨肝膩感，好吃。
甜品之一有紅桑梅馬卡龍，面層鋪上玫瑰花瓣，女生一定 like！意大利芝士餅底層是窩夫餅底，口感特別。
藍莓芝士撻上插咗一個藍莓醬波波，讓你自行加醬，勁有心思。
中式 choice
中式下午茶的鹹點由酒店內的米芝蓮二星中菜廳「香宮」出品，估唔到下午茶都食到米芝蓮級數美點。
黃菊清酒阿拉斯加蟹肉凍（右）是中菜總廚莫師傅精心設計，利用不同地方、風味食材做中式點心，如阿拉斯加蟹肉，新鮮感滿滿。素菜腐皮卷（左），外層香脆，餡料香甜。
烤鱈魚伴香芒醬（左） 係餐廳 signature 點心，將魚身烤香，伴襯芒果甜味，好醒胃。烤鴨子姜日本大根卷伴海鮮醬，清、甜、酸、爽，有北京烤鴨影子。
中式甜點都有綠茶！抹茶蛋糕茶味濃郁得來不澀，中間夾層層蛋糕，口感豐富。
抹茶蛋撻撻底鬆化，蛋香甜得來散發陣陣茶香，不甜膩；有金箔裝飾，貴氣 up。
Tea Set 唔少得重要主角——自家製原味及提子味鬆餅。有 Vanilla Custard、忌廉、藍莓果醬及橘子果醬 4 款配搭，都係自家製作，好有 heart。
【甜食必選】
鐵板上！滋滋咋咋冰火 Brownie
除了浪漫鳥籠，仲有「巧克力銀樹」，樹上放上瑞士出品的酒心、果仁、純牛奶及黑朱古力，最特別係掛在樹上的迷你雀籠，裏面放咗笑口棗 / 朱古力，食完仲可以帶走迷你雀籠當 gift，不過數量有限，送完即止㖭！
想快啲享受夢幻下午茶，要快快預訂，溫馨提示：下午茶只設網上訂座，逢星期一至五 2pm-5pm，而每日限 30 位名額，唔好心急 walk-in 啊！
酒廊地方闊落，坐近窗邊可欣賞無敵維港海景。
「烏。語」鳥籠下午茶
供應日期及時間：星期一至五 2pm-5pm
收費：$288/ 位、$488/2 位（設加一）
註：每日供應 30 份
註：只接受網上預訂 http://www.shangri-la.com/tc/hongkong/kowloonshangrila/dining/bars-lounges/lobby-lounge/book-a-table
九龍香格里拉大酒店大堂酒廊
地址：尖沙咀東麼地道 64 號
電話：2721 2111
文：Celia、攝：Pow
【相關報道】
太陽鏡造型下午茶 送名牌 Clutch Bag
【本周焦點】
終於嚟喇！辻利茶舖 ifc 插旗
【今日必睇】
撑明哥！幫基層！買蔡瀾題字慈善飯盒
歡迎你 like 我哋 U Food Facebook Page / U Food Instagram ，取得我哋更新更快嘅資訊！
