「地道」星期五影院：《大丈夫》 去玩記得要小心！
「出嚟玩，一定要小心。」呢句係曾志偉喺《大丈夫》入面嘅對白，仲係九叔（梁家輝 飾）俾大家嘅教誨。
大時大節，香港人咁鍾意外遊，大家出去玩一定要注意安全，尢其喺外地自駕遊，人生路不熟好易出事。萬一發生意外，撞到香港人甚至撞到阿sir就唔係幾好啦！
言歸正傳，今日同大家介紹套喜劇，由彭浩翔導演2003年嘅《大丈夫》，彭導仲憑此片榮獲第23屆香港電影金像獎新晉導演。故事講述4個男人郭天佑（曾志偉 偉）、李永祥醫生（陳小春 飾）、徐嬌（杜汶澤 飾）同處男波仔（賈宗超 飾）把握老婆及女友們去泰國還神嘅短短14個鐘，結伴偷食。不過，太太們都唔係省油嘅燈，結果14個鐘內又走又避，男人們美色在前都要好頻撲！
《大丈夫》其實係用警匪片手法拍嘅偷食故事，入面4個男人借哂的士做掩飾、消費只用現金以免留低証據，用心程度拍得住做大茶飯嘅匪徒！成套戲不斷調戲（抽水？）《無間道》，譬如金句「唔賭唔知時運高、 唔滾唔知身體好」、4個麻甩佬公路邊搵內奸「講廣東話嘅北京人就係內奸」就好「傻強」！成班男人去到網吧，郭天佑食住飯盒同班小姐講價就似足韓琛上身，仲有後巷同班記者水槍戰！
不過《大丈夫》講婚姻之道又講兄弟義氣，最有雷一定係「九叔」，成隊太太殺去夜總會捉姦，佢一個人幫班兄弟頂哂，仲好霸氣咁話「呢度所有女都係我嘅」，從此過住被九嫂（吳君如 飾）軟禁生涯，寧願食紙都唔供班兄弟出嚟！真係爆笑得嚟又替九叔心酸！
男人唔一定全部都去滾嘅，所以另一半又唔需要太擔心，況且依家物是人非，一來香港無哂夜總會，二來以前黃色架步勁蓬勃嘅砵蘭街都因為大商場嘅落成而變哂樣，想好似《大丈夫》咁玩法？都幾難下。
最後都係提提大家，去玩記得要小心。
