喺九龍公園室外池游到水，係識游水嘅第一步
我聽到，有個教練同班學生咁講，理由係，因為個泳池三尖八角之餘，最大原因係泳池多人到極點，你要游，就要好似玩障礙賽咁，甚至，游到一半你可能要由蛙式轉自由式，更誇張只係可以踢腳，因為，多人到你太大動作會踢到人。又或者，你要左閃右避，先至唔會俾人撞到。我幻想，有朝一日應該會變成內地水上樂園果種「People mountain people sea」嘅情景。
去過好多個泳池，九龍公園泳池嘅人流之多，我諗都數一數二喇，當然，仲有斧山道同佐敦谷都幾誇張，但都唔及「九公」。
其實我都同意，情況就如你要學踩單車咁，以為最簡單最直線嘅大圍/ 馬鞍山至大尾篤路段，其實人又多、屎忽鬼又多，橫衝直撞以為自己玩緊GTA亂咁片車，唔知自己只係踩單車，冇返咁上下技術，你好易會炒車。挑戰到呢段香港最易，其實幾乎最難路段，你已經係學識踩單車了。
作為一個超愛水上活動、去水上樂園嘅人，我竟然唔識游水。所以，由去澳洲之前，我已努力學游水，乜式都好，我只想落到水最起碼識游唔會浸死，又俾錢又自學咁搞咗六七年終於學識，成為人生最持之以恆嘅一個活動。好多謝九龍公園呢個池，由我喺1.2米都差D浸死，到今日我可以同呢班屎忽鬼鬥左閃右避，你撞我時、我踢返你，我唔可以話好叻，但總算游到了。
游咗咁多年，去過好多個泳池，睇住香港D公共泳池真係愈嚟愈多人，尤其是今年已去到一個頂點。我相信今年天氣特別熱，係一個原因，香港愈嚟愈多人，都係另一個原因。尤其是，喺九龍公園泳池見到最多種族，我唔講係咩種族，一陣又俾人話我歧視，唔肯包容，但有時真係好嬲，做得多最多騎呢、冇公德心行為，就係呢一班人。諗吓九龍公園個位置，我諗你會估到我講咩人，唔係強國人。早排，我直頭見到有班阿叔同呢班人開波，幾乎打交。我相信，如果真係打，佢地真係會贏，唔係班阿叔，係果班人。
另外，我都係由邊企邊游、間中怕水深要同一深度咁打橫游，但我會望望附近有冇人先咁做，直至今日成功游到，所以我唔會歧視人哋打橫游或者企池中心，但唔該，咁做前，顧及其他人，成個池唔係你玩曬。
仲有，呢度係泳池，唔係水上樂園，請分清楚呢樣嘢。
「有故事的旅人」Facebook Page:
www.facebook.com/360.days.in.australia
「晞。觀影記事」Facebook Page:
www.facebook.com/jackyheimovie
