劉天蘭 我係我

蓄着烏黑的短髮、粗框鏡眼襯托着鳳眼和櫻唇，這就是劉天蘭只此一家的鮮明形象。 一直以來，但凡時尚和品味都彷彿跟她有牽連，而事實上，她的確熱愛營造或分享一切美好的，所以她會替人扮靚、打造形象之餘，最近更在銅鑼灣利園以自己的名字開設了飾物店，開宗明義叫「Tina's Choice」，實行把個人的品味公諸同好。 「其實呢間舖賣嘅幾十個貨品牌子，喺香港都未必有人認識，我只係企番喺形象顧問呢個位，畀香港愛扮靚嗰班多啲choice，所以我哋走嘅係比較多元化嘅路線，咁先可以配合到唔同style嘅女性嘛。」 她多年來遊走於時裝、文字、攝影、影像、電台、電視、電影、音樂等不同範疇，台前幕後角色多多，現在更多了老闆娘一職，問她哪一個讓她最大滿足感，她想也不想即說：「劉天蘭囉！就係我囉！」 都說「劉天蘭」這個角色是很獨特的。 撰文☆周彩霞 攝影☆陳縱宇 部分圖片☆摘自《原來天蘭》 特別鳴謝☆6DEGREES 設計☆陳佩珍 唔係亂興奮 說到開實體店舖搞生意，這趟開「Tina's Choice」查實已是劉天蘭的第二次。九四年，她曾在中環開設過形象攝影店，名叫「架勢堂」。「嘩！都差唔多成廿年前嘅事，嗰座building o依家都拆咗咯。嗰次係個好wonderful嘅經驗，我係好認真去搞，不過我啲心機係去晒我本來擅長做嘅嘢度，但作為一個老闆，我喺管理同財政方面嘅心機都唔夠多。但呢一次，我喺營商方面叻過以前九萬倍，而且我亦都好努力去平衡兩面嘅比重，慎重咗好多！ 「呢個係我事業上一個比較重要嘅decision，並唔係賺錢買花戴，亦都唔係亂興奮，所以我一直搵咗好多唔同範疇嘅老友開會傾，例如做business嘅、做律師嘅、做首飾manufactory嘅都有，然後就定方向、計條數，跟住我就去唔同地方嘅fair搵啲適合嘅產品。」 接着，她去年底先在藝穗會舉行了一連兩天半的Pop-Up Bazaar小試牛刀。「嗰個嘅反應好positive，對成件事都係一個好大嘅鼓勵，跟住我哋就真係開始搵office、搵舖位同入貨。」十一月中，店舖正式開張，由店面裝潢到貨品款式，都可以說是她個人品味的投射。 長衫的日子 Tina成長於六十年代，父母均於報館工作，亦曾與金庸（查良鏞）和梁羽生（陳文統）兩位武俠小說大作家同一屋簷下。「我出世之前，我爸爸同媽媽因為喺《新晚報》同《大公報》打工，所以住喺摩利臣山道嘅員工宿舍，即係一個單位有頭房、中間房、尾房，然後住咗好多家人嗰啲，咁嗰陣查伯伯同陳文統叔叔就係同我爸爸媽媽一齊住。我哋細個嗰陣，都要去查伯伯嗰度拜年。」 她四歲時，父親因空難離世，母親把從報館拿取的撫恤金買了房子，她和哥哥、姐姐三兄妹的日常生活，則由傭人萍姐照料。「如果問，我嘅品味邊個影響我最深，第一個一定係我媽咪！佢係早期嘅職業女性，喺報館做編輯，佢啲衣着好簡單、好端莊，但又好講究細節，『乜嘢色襯乜嘢色』、『（着衫）唔好太loud』、『金色好俗氣呀』呢啲說話，我由細聽到大。 「至於萍姐呢，其實佢好叻，I.Q.亦都好高，佢只係唔識字，但佢識煮飯又識做衫，佢嗰陣會剪啲報紙嚟做紙樣，跟住我哋有時放咗學，都係跟佢去花布街買布做衫，我哋啲去街衫同校服都係佢做！我諗，就係呢啲薰陶，令我知道咗衫唔一定係ready made，亦都可以做出嚟。」 她小時候就讀的聖保羅男女，也是薰陶她品味的另一個途徑。「嗰個年代啲老師，個個都係着長衫，even連西人老師同校長都着，你諗吓成件事幾優雅、幾端莊？」 異鄉的青春 中四那年，Tina負笈加拿大溫哥華，因為哥哥劉天均的關係，她在當地繼續學業之餘，也在華語電台和電視台兼職開咪和上鏡，更開始涉足跟扮靚有關的事情。 「我小學放暑假嗰陣去裁剪學校讀過裁剪，at least我明咗一件衫嘅結構係乜嘢。咁到我喺溫哥華中學畢業時，我就買咗Vogue嘅Patterns，揀咗一條裙嘅紙樣，然後喺唐人街買咗深藍色嘅silk，就自己做咗件有腰帶嘅長衫去參加畢業舞會。嗰晚得我一個係東方look出現，其他女仔都係吊帶、露事業線嗰啲，哈哈哈！ 「其實我之後喺嗰邊做嘅好多part-time，都係同扮靚有關，例如我喺make up studio做過，所以我就學識咗化妝；跟住我哥哥有個法國朋友，要搵個中國女仔做model，就搵咗我去，咁我又開始咗做part-time model，接觸多咗fashion嘅嘢。好多點點滴滴加埋，好似開咗道門，整定（當形象顧問）咁，哈哈。」 一九七八年，她更在那邊參加了華人小姐選美，得了冠軍。「我嗰陣喺Simon Fraser University讀傳理系，佢哋第一年搞華人小姐選美時，我就負責去拍嘢，之後畀我哥哥嘅節目播。跟住第二年，佢哋叫我參加，咁我第一年都知道個運作，覺得幾好玩咪參加囉，跟住就話贏咗囉。」 友好的關係 七十年代末，她回流香港，在無綫當過藝員拍劇，又為雜誌當過時裝model，其後更開始擔任《號外》主編、Esprit當品牌形象顧問、唱片封套和電影美指等，數十年來，台前幕後百足咁多爪，漸漸成為了香港的fashion icon，其獨特的品味和風格深入民心，就連她和岑建勳八十年代那段維持了四年的婚姻，也處理得很有型，事隔廿多年，至今二人已成為了很要好很要好的朋友。 「兩樣嘢結合埋一齊，先可以叫marriage，呢個lesson係話畀我知，marriage係要兩個人共同努力嘅一件事，係要兩個人都要出力去建立、維護、share同manage嘅一樣嘢，it's not easy！有啲問題擺得耐，miss咗一個可以救番嘅timing，就冇得救㗎啦！ 「我以當時嘅智慧，去做呢個（離婚）決定，只係覺得我同阿John（岑建勳）嘅關係同形式唔work，亦都拉唔番，咁對大家同下一代都唔係咁好，既然係咁，不如停咗佢啦！但咁唔代表我恨呢個人，或者要憎呢個人㗎嘛。」 但這樣的關係轉化，過程會否很艱難？「跟住又好lucky喎，我同佢as真係做番朋友，又好good喎，even佢仍然係我個女（岑寧兒YoYo）嘅老竇，個關係都好好喎！其實都真係要岑生自己都有呢個諗法先得，所以我用lucky呢個字眼囉。」 還有想過再婚嗎？「呢廿幾年嚟，我都拍過好多次拖，有長有短，我自己都有諗過，其實我真係唔係好需要結婚，兩人as companion，相處得開心就好夠，咁結婚又為乜呢？所以我可以好老土咁答你，隨緣啦！哈哈！而且，我o依家要搞『Tina's Choice』，我真係唔係好得閒去諗呢樣囉！哈哈哈！」 這就是Tina's Choice囉。 Tina的店舖，門面玻璃以她的嘜頭作裝飾，相當搶眼。 去年底在藝穗會舉行了兩天半的Pop Up Bazaar，小試牛刀。 九四年，她曾於中環開設了樓高三、四層的「架勢堂」，做形象拍攝服務。 一九七八年，在溫哥華當選第二屆華人小姐選舉冠軍。 十多歲時，因哥哥緣故，在溫哥華華語電台和電視台報新聞，成為了她的課外兼職。 在香港讀中學期間，她愛上了音樂，愛上了結他。 劉家三兄妹，左起哥哥劉天均、劉天蘭，以及姐姐劉天梅。 店舖開張當日，前夫和女兒也有撐場。「如果要我數全世界好好嘅friend，阿John實有份！我間舖連埋我有五個股東，佢都係其中一個。佢同我同YoYo嘅關係o依家係好好、好好，因為我同阿John都冇喺個女面前數落過對方不是。」 女兒岑寧兒還未足一歲時拍的照片。「離婚前阿John成日都要做嘢，好少同個女見面；但離婚後，YoYo定期要去爸爸度，兩父女反而見得多咗。不過YoYo從來都冇問我哋離婚嘅嘢。」 八四年，Tina和岑建勳共諧連理，但這段夫妻關係只維持了四年。