雅虎香港新聞 森美專欄：男人比女人睇得愛情更重
有樣野男人同女人爭拗咗好多年，就係邊一方對愛情睇得重啲。
我就梗係覺得男人比女人對愛情睇得較重，原因好簡單，就因為我係男人。不過當然，我都有客觀嘅證明。單單講一見鍾情，男人就比女人容易一見鍾情好多。男人可以對於第一眼見到嘅女人話愛就愛，純粹靠本能反應，能夠刺激到佢荷爾蒙嘅女人就係佢愛嘅人，咁樣係好合理，因為冇野準得過荷爾蒙分泌！
女人就唔係咁樣，女人就算望到一個能夠令佢有荷爾蒙分泌嘅人都會按捺住自己嘅情緒，然後開始諗眼前嘅男人有冇錢？做咩職業？有冇不良嗜好？會唔會照顧到我？呢啲對女人嚟講都係理所當然，但我就覺得呢啲係對愛情嘅不信任，係對愛情嘅計算！我地男人絕對冇呢啲考慮，男人唔會諗佢係咪識得湊仔？係咪值得將我嘅基因交托俾佢？因為男人比女人更相信愛情感覺。
當愛情離開時都一樣，好多男人可以話唔愛就唔愛，可以即刻冷淡，唔念舊情，但女人為咗仔女、為咗生活、為咗呢樣、為咗嗰樣，可以一味死忍。
所以，男人對待愛情係更加原汁原味，男人比女人更加忠於愛！
作者Profile:
森美
DJ、金牌司儀、棟篤笑講者、製作公司老闆、專欄作家，他不放過任何渠道，誓要透過不同身份、不同平台發揮源源創意。
Related Articles
