大台五套經典難頂劇集 你記得邊套？

話說大台一年一度嘅節目巡禮就啱啱舉行咗，場面更係大啦，除咗有差唔多成千個廣告客外，大班藝員都一定要出動，好似黎耀祥、陳展鵬、羅霖、劉心悠等等超過190個藝員，個個都借呢個機會出位搶鏡。活動焦點當然就係要公佈嚟緊一年有咩重點製作嘅劇集同綜藝節目，「劇王劇后」分別就係蕭正楠、王浩信同田蕊妮，各佔三套（吓乜又係佢哋？）。不過大台成日講到啲劇幾咁大製作、劇本幾咁勁，但始終都掩飾唔到是是但但嘅製作同翻炒嘅內容，好似「煮碗麵你食」、「結局要跳起yeah」、「幫朕check下」、家族爭產、辦公室政治⋯⋯好明顯連師奶都嫌悶。

好心做嘢就認真啲啦，咁樣出到街咪一樣畀網民大插同逼人熄電視。今日就等我哋來個大台膠劇巡禮。

神鎗狙擊（2013)

作為最近無記乜乜狙擊系列嘅最後一輯，劇情真係誇張。謝天華竟然可以單手爬山，然後仲可以一隻手講電話咁瀟灑，會唔會係咁呀！

叛逃（2014）

呢套劇比起謝天華更加過之而無不及，其中一幕就講關禮傑就同陳展鵬喺反恐訓練期間鬥由一個天台跳到另一個天台。奇怪嘅剪接同勁過奧運選手嘅劇情，難怪畀人惡搞仲笑到而家。

愛回家（2012-）

呢個系列由2012年開始，中間雖然換過人，做到今日嘅《八時入席》已經長過《真情》，講嚟講去都係雞尾蒜皮同辦公室入面嘅無謂嘢。喂，真係好厭囉，幾時先真正做完愛・回家？

桌球天王（2009）

呢套係少有以桌球為主題嘅劇集，但係入面果啲假到無倫嘅電腦特技，加上好似用武功一Q清枱嘅技術，澤西哥都打唔到啦。

來自喵喵星的你（2016）

一睇個劇名就知係抄都敏俊啦，成套劇除咗唔知講乜之外，觀眾最頂唔順就係要睇成40歲嘅田蕊妮扮貓，今次真係連師奶們都頂唔順。

相片來源：TVB.com