雅虎香港新聞 
DJ杜浚斌 背妻偷食嫩口版翠如
由杜浚斌(Ben)、林盛斌(Bob) 及范振鋒(Ricky) 主持的電台《新香蕉俱樂部》，多年來為唔少聽眾解決感情問題，一直深受年輕男女歡迎。不過今次就到主持人自己有感情問題！話說39歲的阿Ben轉去網台後繼續開咪，日前佢就被踢爆近水樓台偷食節目主持陳貝怡，仲大膽到手拖手上女方屋企幽會！而呢位陳小姐同黃翠如仲有幾分相似，佢真識食！
多年前阿Ben與Bob及Ricky主持新城知訊台節目《新香蕉俱樂部》，三人多以嬉笑手法解決聽眾的感情問題，深受年青男女歡迎，為收聽率長期高企的長壽節目。不過後來阿Bob及范振鋒相繼被調到另一節目，三人亦多是「單飛」發展，《新香蕉》其實已經名存實亡。
去到今年一月，阿Ben宣布離開服務多年的新城電��，並於三月加盟D100網絡電台，聯同其他主持重組《香蕉俱樂部》。拍檔除有強尼、關逸基等人，仲有來自澳門、樣子甜美的年輕女新人陳貝怡！
今日有報道指，與圈外女友Renee結婚約兩年的阿Ben，竟然近水樓台偷食陳貝怡！有晚收工後，本來係阿Ben、陳貝怡及強尼三人行，不過強尼之後離開，就得番佢哋二人世界！兩人一齊去到紅磡，仲以為夜闌人靜冇人見到，大膽到拖住手上女方租住的唐樓短聚！事後阿Ben被發現，就稱二人只係普通朋友，未試過在對方屋企，拍戲後上去沖涼就試過。
據知陳貝怡今年只係二十出頭，新入行咩都唔識，不過就勝在名嫩口同樣子甜美！陳貝怡今年二月先搬到香港，租住紅磡的唐樓，阿Ben見佢幾靚女，所以搵佢一齊主持《香蕉俱樂部》。咁人哋一個弱質女子隻身來港，人生路不熟，阿Ben自然對佢特別照顧… 照顧到上埋人哋屋企。其實兩人緋聞好多同事都知，不過一直都未有人踢爆，可能係擔心阿Ben太太受刺激？
從呢個側面睇，陳貝怡有啲似翠如BB喎！
雖然阿Ben就話同陳貝怡只係普通朋友，不過佢今日凌晨就在FB開Live，見到佢奇怪地躲在廚房做直播，佢就話因為太太在廳做緊嘢做到好攰。咁點解阿Ben唔幫太太手呀？
講起太太，有網民就問佢打算幾時做爸爸？此時阿Ben就答得有啲耐人尋味，而且嘆晒氣！佢話首先要婚姻狀況好理想，先應該考慮有小朋友，而婚姻就好似過山車咁，對佢嚟講好奇怪，承認婚姻有問題！阿Ben平時口才咁好，又開班教授說話技巧，唔知佢今次點樣氹番太太呢？
