麥明詩發表卸任感言串爆馮盈盈：要「始終如一」

2016年港姐賽果已經出爐，由大熱6號馮盈盈（Crystal）以36,679票奪得冠軍，但係一出爐就即刻被起底！原來樣貌甜美嘅馮盈盈絕不離地，仲非常關注政治，經常喺個人社交網站對政治發表個人感想，有時更會夾雜粗口。陳年舊事被挖出後，網民反應兩極，有人認為佢係品德最差港姐；又有人認為香港人有邊個冇講過粗口，講粗口係正常事。

至於馮盈盈對爆粗一事，佢就話自己當年「少不更事」，先至會以過激語言表達意見。佢仲話因為喺香港土生土長，好關心香港嘅時事，加上當時啱啱入大學，受到大學校園「狂熱氣氛」影響，先至會「愛之深，責之切」，佢更加強調自己私底下唔會講粗口。

而卸任嘅麥明詩噚晚喺Facebook發表卸任感言，佢就話一年前佢曾經講過要「賢良淑德」，佢今日想加多一句要「始終如一」。多謝港姐畀咗好多機會、選擇和挑戰佢，呢啲經歷鼓勵佢要學習堅定，唔好為其他人忘掉自己；要毋忘初衷，要一如既往。最後，麥明詩多謝大家同埋祝願下一屆的香港小姐能夠薪火相傳、青出於藍。

卸任感言一出，麥明詩疑似有串爆馮盈盈之嫌，唔少網民都好欣賞麥明詩「仍然記得始終如一，冇俾金錢名利收買」、「真。港姐！」、「呢啲先係美貌與智慧並重」、「唔會今日的我，打倒昨日的我」等等, 仲有網民叫佢考慮連任添！