賀歲劇《乘勝狙擊》掀抄襲疑雲

無綫賀歲劇《乘勝狙擊》星期一首播就已經掀起話題，除咗介紹嘅千門七傑、劇集第一集播出就已經搵嚟陳展鵬、林夏薇疑似全裸上陣，其後又有陳山聰喺尾段玩大型魔術加騙術演出，成功令到劇集得到26點高收視，都算係打響頭炮。

不過劇集除咗掀起話題之外，亦掀起咗抄襲疑雲。首先劇中嘅千門七傑就已經同三年前上映嘅西片《非常盜》入面嘅「四騎士奇藝坊」非常相似，而陳山聰嘅魔術行騙伎倆亦同電影十分吻合，同時亦被批劇情太離地兼浮誇。

除咗似《非常盜》此外，亦有網民發現佢同90年代亞視經典賭劇《勝者為王》有好多吻合之處。就好似吳岱融將啤牌拋向半空，再隨手抽出一副靚牌嘅情節，就同當年呂頌賢同賭王秦沛對賭時凌空抽牌嘅情節一樣。而《勝者為王II》入面講述屠天龍嘅大腦被植入電腦晶片，可以計算對手有咩牌嘅情節，亦同潘志文植入晶片喺眼透視嘅畫面如出一轍。

另外，林夏薇喺劇中因為為咗籌錢不停打麻雀，仲要一個人同時打四張台。呢個場面正正同電影《雀聖2自摸天后》中應采兒一個人同時打三張台嘅畫面如出一轍。

雖然《乘勝狙擊》監製葉鎮輝接受訪問嘅時候就話：「我無睇過《勝者為王》，唔知佢講乜，所以無參考過，亦都無抄襲過。」咁莫非就真係好似網民話齋「亞視永恆」？