終於除低面罩 網絡女歌手「小背心」真人原來係佢！

每年出道嘅歌手多不勝數，但係成功彈出嘅又有幾多個呢？為咗引起關注，近年唔少歌手都興蒙面唱歌，俾各位網民玩「猜猜我是誰」，好似之前嘅龍小菌同JC都係憑蒙面唱歌而引起關注。

前排網上又爆出咗一位神秘網絡女歌手「小背心」，每次佢拍自彈自唱嘅片，佢都會淨係影住佢著嘅小背心，但係就見唔到個樣。而佢嘅Facebook 專頁開咗短短五個月就已經有唔少粉絲群住，紛紛讚佢身材好、唱歌又好聽。

就係因為咁就儲落一班粉絲， 噚晚仲喺九展舉行音樂會，吸引六百歌迷入場支持。有指當時網上派飛嘅時候僅僅一個鐘頭門票就已經俾人掃晒。而噚晚演唱會前部份「小背心」繼續玩神秘，著住背心裙加面罩表演。不過去到尾段，佢就終於除低面罩示人，原來就係英皇歌手許靖韻。

咁點解佢會用小背心呢個名？其實係有一次佢拍咗一條唱衛蘭歌曲嘅片，但係就俾人遮住咗個樣，但係反應仲好過見樣嘅片，而當時佢就係著咗件小背心。

其實喺真相揭曉之前就已經有網民覺得佢唱功咁好，應該已經簽咗唱片公司，再憑聲線估佢係許靖韻。之前已經有記者問過「小背心」係唔係已經簽咗唱片公司同埋係唔係許靖韻，「小背心」嘅回覆就係話「多謝你嘅關注，選擇唔見樣係希望大家專注於音樂上，希望大家高抬貴手！謝謝！」