【省鏡過女一】《射鵰英雄傳》 孟子義勁搶眼 被封「最美穆念慈」

近排唔少人都大讚無綫正在播放嘅內地劇《射鵰英雄傳》，除咗讚套劇嘅拍攝技巧之外，仲大讚劇中女角省鏡。當中女主角李一桐受到唔少網民喜愛，有「最美黃蓉」稱號，仲有「最索梅超風」嘅米露。最近連飾演穆念慈一角嘅孟子義亦都被封為「最美穆念慈」，甚至有人認爲孟子義比李一桐更靚、更有氣質！

飾演穆念慈嘅22歲女星孟子義，畢業於北京電影學院表演系，憑住佢精緻嘅五官被推選為「北影校花」，畢業後即被各大電視台爭奪。孟子義第一部劇就參與大制作《武神趙子龍》，佢係劇中做韓星允兒嘅丫鬟。本來以為觀眾未必留意到佢啦，點知佢喺允兒身邊完全無比下去，仲引起咗好多觀眾關注。

事實上孟子義都唔係淨係得個樣，佢將穆念慈嘅外柔内剛、温婉痴情嘅性格完全表露出黎。穆念慈一生深愛楊康，最終要用鐵槍刺死楊康，隨即以身殉情。呢一幕獲得網民讚口不絕，仲覺得佢比起女主角李一桐演得仲好。

孟子義出道短短兩年，喺內地已經已經成功獲得觀眾關注，微博粉絲人數更衝破200萬，佢絕對係中國影壇一顆明日之星。