倉底劇《蘭花劫》重見天日 懷緬已故陳鴻烈魯芬曾守明昔日風采

有傳無綫原本諗住以劇集《三個女人一個「因」》接《不懂撒嬌的女人》棒播出，不過日前突然改變主意以《蘭花劫》代替。由田蕊妮、蘇玉華、唐寧及陳錦鴻等主演嘅《蘭花劫》，其實係無綫10年前嘅作品，劇集仲喺07及08年喺海外及TVB收費頻道播出。唔少人都問點解無綫會揀呢套十年前嘅倉底、低清劇喺以4K全實景拍攝嘅《不懂撒嬌的女人》之後出街？！無綫就話呢套劇係片庫中嘅滄海遺珠、劇中演員用心演出獲得好評、真實感強烈，因為當年係喺香港第一所監獄中環域多利監獄取景，同埋劇集會重新以數碼技術優化聲畫。

話晒呢套劇放咗喺倉底都有10年，10年時間真係可以改變好多嘢，除咗畫面質數唔同之外，劇中演員都好大轉變，好似田蕊妮及胡定欣已經係視后級人馬、唐寧及陳自瑤已經成為人妻、更有唔少演員已經離巢，不過最可惜嘅係劇中飾演監獄長成堡嘅陳鴻烈、飾演做替死鬼嘅死囚旺嫂魯芬及飾演警察局長寶家安嘅曾守明都已經相繼離世。如果大家想懷緬佢哋昔日嘅風采，就記得收睇啦！

民初劇《蘭花劫》主要講述三姊妹嘅恩仇，蘇玉華飾演嘅炎沛湖，重遇失散多年嘅家姐江麗雅（田蕊妮飾）及細妹蘇菲（唐寧飾），炎沛湖為咗唔想坐監，竟然欺騙家姐自願代佢頂罪。之後，江麗雅知道一切都係炎沛湖預先安排，蘇菲為咗幫江麗雅逃獄而知法犯法。最後，炎沛湖為求自保，竟然可以對江麗雅趕盡殺絕兼殺死蘇菲。